Carta de non despedida

Queridos rapaces e rapazas:

Estades a piques de comezar unha nova ruta, despois de compartir un anaquiño da vosa viaxe con nós, madurando baixo a atenta mirada  dos vosos profesores e a carón dos vosos compañeiros. Persoas ben coñecidas que fixeron o voso mundo bonito e seguro.

Nestes momentos, o corazón fáisenos pequeniño, pero a nosa esperanza é inmensa …

Chegastes aquí un chisco asustados, cos ollos moi abertos e as risas moi fáciles. Pronto pasastes a sentirvos  capitáns ... e aínda non pasabades de grumetes. Nesta instituto fostes piratas e heroes,  aprendestes números e letras, fórmulas e mapas, datos e datas, conceptos e competencias…  Pero sobre todo, sobre todo, aprendestes  a crear beleza, a ser flexibles nas vosas respostas, a encaixar, a perder o medo, a cambiar de opinión,  a xestionar as emocións, a madurar ao mesmo ritmo que medrastes.

Agora marchades a un espazo máis aberto. Tedes que prepararvos, bater as ás ben forte para que cando chegue o momento podades voar moi alto, tan alto como sexades capaces de soñar.

Estamos seguros de que levades de nós, do noso centro, unhas raíces profundas que vos marcarán o camiño de agora en diante. Sodes fillos da terra, do esforzo e traballo dos vosos pais e nais, sentistes o orballo na pel e vistes nacer o sol e a lúa a diario como parte dos vosos xogos. Vivistes a natureza antes de estudala nos libros…

Queremos achegarvos esta carta para que vos sintades acompañados neste momento de inquedanza para vós. Gustaríanos moito que fose a primeira páxina dun diario, dun libro para escribir a vida.

Nel debedes escribir os vosos soños, as vosas metas. Nel estarán tamén os vosos erros para que vos axuden a ser máis fortes. Estarán as ilusións e as alegrías. Estarán os nomes dos vosos amigos.

Enchede as páxinas coas letras que aprendestes neste instituto que aínda non vos di adeus. Esas letras serven para axudar, para defender, para loitar, para coidar, para querer. Con elas, e co exemplo que vos deron nas vosas familias, poderedes facer un mundo mellor para todos.

Desexámosvos de corazón que a vosa viaxe vos converta en magníficas persoas, traballadoras e honestas. Debedes ser ambiciosos na vosa formación pero non esquezades quen sodes e de onde vides. Coidar das vosas raíces debe ser para vós unha prioridade. E se toca voar, voade xuntos. Sabemos que dentro duns anos nos sentiremos orgullosos e orgullosas de cada un de vós.

E se nalgún momento a vida vos manca un pouquiño, loitade e seguide. Con forza, porque sabedes  que non estades solos.

Contade con nós para escoitarvos cando o necesitedes,  para arrimar o ombro se aparecen dificultades, e para compartir os voso éxitos, eses que sabemos que vos están esperando.

Sempre.                                            

 Unha aperta, e moita sorte.

IES AS MERCEDES